Fresh 48 фотосесија во болница Жан Митрев

Првите часови со Симеон

Сè уште го чувствувам треперењето на моментот кога влегов во болничката соба за мојата прва Fresh 48 фотосесија. Таму ме пречека едно ново мало срценце – Симеон, само неколку часа по неговото доаѓање на свет.

Овој вид на фотографирање е навистина уникатен. Тоа не се само фотографии – тоа е времеплов до првите часови од животот на бебето. Спомени што премногу брзо избледуваат во хаосот на новата реалност, но преку фотографиите остануваат засекогаш живи.

Покрај гордата мајка, таткото и најмалечкиот Симеон, таму беше и неговата љубопитна и возбудена сестричка, која со трепет и љубов го гледаше своето ново братче. Нејзините погледи и допири беа тивки, но полни со емоции – толку автентични, толку вредни за паметење.

Сакав да ги уловам сите тие детали што премногу брзо се менуваат – малечките рачиња, ушенцата, устенцето што сè уште се навикнува на светот. Сакав да го запрам времето, макар само за момент.

Освен интимните моменти со семејството, фотографирав и делови од болничката реалност – пумпата за измолзување, креветчето, шишињата… тие „обични“ предмети што за една мајка значат сè во тие први денови. Тоа е дел од приказната – искрена, сурова, и бескрајно убава.

Fresh 48 фотографијата не е за совршенство. Таа е за вистината. За љубовта што се раѓа заедно со бебето. За мајките што ќе се навратат на овие фотографии и ќе се сетат на секој мирис, звук и чувство од тие први, непресметливо драгоцени 48 часа.