Во меѓувреме, дојам“ – Изложба што ја отвори вратата кон невидливото мајчинство

Сè уште сум под импресии од првата моја самостојна изложба, и срцето ми е полно.
„Во меѓувреме, дојам“ не беше само фотографска изложба – беше искуство, разговор, препознавање, солзи, гушкања и тишина полна со разбирање.

Во текот на три дена, низ Центар Јадро поминаа толку многу прекрасни луѓе – мајки, татковци, баби, пријатели, здравствени работници, поддржувачи… Секој со своја приказна, свој поглед, своја емоција. Некои се расплакаа, некои молчеа, а многумина првпат видоа колку е силна и нежна истовремено мајката што дои.

Не фотографирав само мајки што дојат — туку приказни што чекаа да бидат видени. Љубовта, борбата и тишината зборуваа повеќе од кој било збор.

Како започна сЕ?

Пред само неколку месеци, сè беше само идеја – едно „што ако?“ што го носев во себе.
Ивана од @doilkamk ми напиша порака со идеја за одбележување на Светската недела на доењето, и речиси инстинктивно ѝ понудив:
„Сакате изложба со фотографии на мајки што дојат? Сметајте на мене.“
И така почна еден месец исполнет со снимање, слушање приказни и создавање визуелна приказна од 13 мајки и нивните бебиња.

Што сакав да прикажам?

Сакав да се види вистината зад доењето – не само романтичната, туку и тешката, заморната, болната. И, над сè, сакав да се прикаже храброста на мајките кои секој ден го прават она што им изгледа „нормално“, но всушност е јуначки.

Ви ги споделувам сите фотографии од изложбата 📸

За оние кои не успеавте да дојдете лично…

Знам дека не сите имаа можност да ја посетат изложбата во живо, но не сакав да останете без дел од ова искуство.
Затоа, ви ги споделувам фотографиите кои беа дел од изложбата „Во меѓувреме, дојам“ – токму онака како што беа поставени во просторот.

Секоја фотографија носи своја приказна, своја тишина и своја емоција.
Некои моменти се полни со спокој, други со борба и истрајност, трети со нежност што се чувствува длабоко.
Се надевам дека и преку екранот ќе успеете барем малку да ја почувствувате силата и топлината што ја донесе оваа изложба.

⬇️ Продолжете да скролате и нурнете се во интимниот свет на мајките што дојат – храбри, вистински и безвременски.

Мајка која годи две бебиња, близначиња во исто време — Доењето на едно бебе знае да биде предизвик. А што кога има две гладни усти, две мали тела кои бараат исто време, исто срце, исто млеко? Оваа фотографија ја прикажува храброста и истрајноста на мајките на близнаци – нивната секојдневна дилема: дали ќе има доволно? Но токму ова е доказ дека љубовта и телото се способни за повеќе отколку што веруваме.

Мајка дои новороденче, бебе старо само неколку дена — Ова е нејзиното трето бебе. Уште од првото, доењето ѝ било природно и без проблеми. Сега, со третото, таа е посигурна, поопуштена и уште повеќе се поврзува со бебето. Знае што му треба, како да му даде. Нејзиното искуство ѝ дава слобода да ужива во секој миг на блискост и љубов.

Мајка дои бебе на автобуска станица, додека човек во позадина ја набљудува — Мајката дои на автобуска постојка, храбра и посветена. На другата клупа, непријатен поглед и осуда – реалноста со која се соочуваат многу жени. Доењето во јавност не треба да биде причина за осуда или непријатност. Тоа е најприродниот чин на љубов и грижа, заслужува почит, не критика.

Мајка дои бебе додека лежи на кревет – момент на спокој и поврзаност во домашна атмосфера. — На оваа фотографија, мајката дои во легната положба – не од удобност, туку од нужност. После мастит, болка, температура и на крај – хируршка интервенција, таа сепак продолжи. Продолжи да дава, да трпи, да сака. Доењето понекогаш е борба со сопственото тело. Но во оваа борба, љубовта победува

Мајка која ги дои двете деца истовремено, помалото бебе и поголемото дете — Таа дои двајца, едновременно и со полно срце. Едното бебе на едната града, поголемото дете на другата. Секој момент е предизвик и радост, истовремено. Оваа фотографија го покажува колку мајчината љубов е бескрајна и способна за секакви подвизи.

Мајка дои бебе додека пие кафе во надворешна тераса на кафуле, опкружена со луѓе. — Мајка седи во кафич, го држи своето бебе, пие кафе – и дои. Не се крие, не се извинува, не го прекинува моментот. Околината продолжува – некој чита, некој зборува, некој не ни забележува. Да се дои во кафич не треба да биде храброст – туку секојдневие.

Мајка дои бебе на раце додека работи на лаптоп во кујна, со документи и кафе на маса. — Мајка. Адвокат. Жена со канцеларија, клиенти и рокови – и бебе на града. На оваа фотографија, таа дои додека работи. Ова е реалноста на многу мајки кои ја живеат и кариерата и мајчинството – паралелно, без да се исклучат од едното за да го задржат другото. Зашто мајките не „престануваат“ да бидат ниту едното, ниту другото – тие постојано се и двете.

Мајка која го дои своето бебе со силиконска брадавица — Почетокот беше тежок – рамни брадавици, солзи, сомнежи и силиконски помагала. Но мајката не се откажа. Повторно и повторно се обидуваше. И денес, бебето цица директно – додека во малата рака ги стиска силиконските брадавици, како трофеи од битка што е добиена.

Мајка која дои со помош на систем за доење — Кога мајчиното млеко не е доволно само од градата, таа не се откажува. Со системот за доење (SNS), продолжува да се бори и да му дава на бебето сè од себе. Ова е приказна за мајчина упорност – за љубов што не се повлекува, за сила што бара решение и не се откажува, без разлика на предизвиците.

Мајка која го дои своето бебе, истовремено го чисти домот — Со едната рака чисти, со другата храни. Со срцето – се обидува да биде присутна на сите места во исто време. Ова не е сценарио од некој филм или перфектна слика за социјалните мрежи. Ова е секојдневието на многу мајки. Тивко, невидливо јунаштво. Таа не поседува супермоќи, но секој ден ги прави невозможните нешта: се грижи, дои, одржува, сака.

Мајка дои бебе во прегратка, додека нежно ја потпира главата врз главата на бебето. — Бебето е на града, а мајката го гушка со целото срце – нежно, длабоко, присутно. Нема зборови, нема врева, само тивка размена на љубов. Оваа фотографија зборува со емоција. За мирот што го носи доењето. За она чувство кога сè е на своето место – само затоа што се држите еден до друг.

Блиска фотографија од бебе кое дои и директно гледа во камерата – топла и интимна сцена што го доловува контактот очи во очи меѓу мајка и дете. — Бебето цица и гледа право во мајката. Понекогаш се одвлекува, па повторно се фаќа, сака, па не сака. Како што расте, така се менува и неговата потреба, неговиот ритам, неговата желба. Фотографијата го прикажува живиот и динамичен момент на доење – полн со љубов, предизвици и промени.

Мајка која го храни своето бебе, но се храни и сама себе — Доењето е момент на давање. Но понекогаш, истовремено е и обид за земање – на енергија, на здив, на неколку залчиња. Таа седи, јаде и дои – затоа што не постои „совршен миг“ за оброк. Мајчинството не значи да се изгубиш себеси, туку да се грижиш за другите додека внимавиш и на себе.

Две другарки ги дојат своите бебиња на отворено, во парк и разговараат — Две мајки. Две бебиња. Еден заеднички момент. Седат во природа, дојат, зборуваат, се смеат… и си даваат сила една на друга. Оваа фотографија не е само за доењето – туку за заедништвото, поддршката и разбирањето што на мајките им значи сè. Зашто понекогаш, најголемата храброст доаѓа кога не си сама.

Мајка дои бебе во јавен простор, стоејќи мирно во парк додека луѓе се движат околу неа – симболична црно-бела фотографија што ја истакнува интимноста на доењето во хаотичниот урбан живот. — Мајките не паузираат од мајчинството кога се надвор. Додека светот се движи околу неа, таа стои мирно – во својот момент на близина и љубов. Јавното доење не е драма, ниту провокација – тоа е природен дел од животот. Нешто што не треба да се крие или оправдува. Тоа е секојдневие кое заслужува прифаќање, не осуда.

Благодарност

Овој настан не би можел да се реализира на ова ниво без поддршката од сите оние кои веруваа во идејата и се вложија со срце.

🔸 На Јасна (@bebelogija), Наташа (@doenje_so_ljubov) и Ивана (@doilkamk) – ви благодарам за иницијативата, визијата и целосната поддршка од самиот почеток. Ви благодарам што верувавте дека оваа идеја заслужува свое место и простор.

🔸 На Општина Центар и Центар Јадро, кои несебично ни го отстапија просторот за одржување на изложбата и целиот настан – ви благодарам што овозможивте интимниот свет на мајките да стане достапен за јавноста во вистински амбиент.

🔸 На Ананас – како генерален спонзор на настанот и на сите останати спонзори, кои дадоа свој придонес оваа изложба и програмата околу неа да добијат поширока форма и да допрат до повеќе луѓе:
Реплек · DM · Роса вода · Енци Менци · Бебе Хоме · Мама Драма · Мама не е сама · ewopharma · Coslovemetics · Haakaa Македонија · Штрк · vibboo · Mostly Baby · Philips Avent Македонија · Vivalek · 4U Pharma · Biosave
✨ Се надевам дека оваа убава соработка ќе продолжи и во иднина, затоа што ваквите проекти се можни само со заедничка поддршка.

🔸 На сите мајки кои беа дел од овој фото-проект – ви благодарам за довербата, отвореноста и храброста да застанете пред објективот и да споделите дел од вашето мајчинство. Без вас, оваа приказна немаше да постои.

🔸 И конечно, на сите што дојдоа, што одвоија време, споделија збор, емоција, прегратка – ви благодарам што дозволивте оваа изложба да допре до вашите срца.

Ова не е крајот…

Ова беше само првиот чекор. Постојат уште многу табу теми поврзани со мајчинството кои чекаат да бидат прикажани – реално, искрено, без филтри.
И јас ќе бидам тука, зад објективот, подготвена да слушам и пренесам.

Со љубов,
Драгана | Love Click Photography